Patriarx Krill, professor Saleh Məmmədov və Sofiya…

Bu virus bəlası dünyanı bürüyəndən  bəri insanların  duyğuları, duyğusallıqları da xeyli korşalıb. Yəni təkcə adamların virus qarşısında  iybilmə və dadbilmə hissiyyatı  deyil, insani  duyğuları da ciddi sınaq qarşındadır. Donuxmuş və aldığı zərbədən duruxmuş  bir dünya var qarşımızda.

Hər gün məlum virusdan  minlərlə adam ölür, amma hələ də «xəstəlik yoxdur»deyib üzə dururlar. Bu, duyğunun korşalması deyilmi? Bizim bu tip  adamlarla  işim yox, əvvəl gündən  belə ağılı zatlarla mübahisədən uzaq oldum. Amma elə bizimkilər kimi düşünən, karantin qaydasını pozan rusdan danışacam. Televizya müxbirinə üç  qızının yanında deyir ki,  «koronavirus adlı xəstəlik  filan yoxdur». «Bəs, hər gün bu qədər ölənlərə nə deyirsən» sualına tam  hissiyyatsız   «eto toje loj»dedi. Nəyəsə inanmaq və ya  inanmamaq insan övladı yaranandan var. Allahın varlığını həmişə inkar edənlər olub, olacaq da. Eləcə də bizdən kənarda bir dünyanın olduğuna, oradan gəlib bizim planetdən adam oğurladıqlarına da inanlar var, olacaq da…

Mənə bu günlərdə iki hadisə çox ciddi təsir edib. Onlardan biri Moskva və Bütün Rusiyanın Patriarxı  Krillin  xalqa müraciəti idi. «Mən 52 il insanları daima ibadətə, kilsəyə çağırmışam, indi isə…» deyəndə Krillin səsi tutuldu. Amma özünü ələ aldı, çox ibratamiz  dini tarixi hadisə danışdı, sonra toxtalıyıb nəhayət ki, «kilsəyə ibadətə gəlməyin, evinizdə qalın»deyə bildi.  Başqa zaman olsaydı, bu cür  çağırış bir dini liderinin  sonu  olardı, amma indi dünya o zamana  gəldi ki, Krill 52 illik çağırışının əleyhinə gedib bu sözləri deyəsi oldu. Belə çəkili dini liderləri həmişə hansısa  çevrələrə bağlayıblar, Krill də istisna deyil. Onu həmişə «Kremlin adamı»hesab edirlər və sairə…Amma onun başına tapança dirəsəydilər də, belə bir çağırış etməzdi. Onun hansı duyğular içərisində olduğunu anlamaq çətin deyildi. Görün, dünya hara gəldi, fəqət hələ bəzi əbləhlər də   «virus yoxdur»  deyir.

İkinci  hadisəni isə Türkiyə televiziyalarında gördüm. Bir köyün imamı minbərə qoyulmuş mikrofona  «lütvən, camiyə gəlməyin» deyəndə…hönkürdü.  Əlbəttə, koronavirus yayılandan bəri onlarla duyğulu videolar görmüşük. Xüsusilə həkimlərlə bağlı-biri uşağına sarılmağın   xiffətini edib, biri anasının,bir başqası  həyat yoldaşının… Amma bunların heç biri məhz Krill və adını bilmədiyimiz cami imamının  müraciəti kimi  bəşəri hadisə deyil.

Şübhə etməyin ki, Allah evlərinin koronavirus səbəbindən qapılarını  bağlaması  dünyada ateizmi  artıracaq,  insanların ürəyində mərhəmət hissini  azaldacaq, minillik mədəniyyət abidələrini dağıdan İŞİD-lərin yeni davamçıları  meydana gələcək. Dünyada daha qəddar kapitalist münasibətləri formalaşacaq. Adamların   nanotexnologiyalar üzərindən idarəolunmasının məşqi artıq  edildi. Məlum oldu ki, müəllimənin sinifdə nəfəsini  duymadan da «ana» sözünü öyrənmək, qapısını döymədən yaşlı valideyinlərini  skaypda  «qucaqlamaq», evdən çıxmadan  bir-iki  düyməni əlavə basmaqla ofis işlərini  görmək də mümkündür. Hələ daha nələr, nələr…

Yeri gəldi deyim: Elçibəy hakimiyyətinin  naziri olmuş professor Saleh Məmmədov musavat.com – da  bunlardan yazır, həm də  hökumətə maraqlı  təkliflər verir. Amma o yazılarda bağışlayın məni, emosiya yoxdur, insan istiliyindən əlamət yoxdur. Sanki  dünya elə yüksək  texnologiya ilə idaetəməyə keçsə, hər şey düzələcək. Texnoloji şübhəsiz, insan həyatını asanlaşdırır, amma bütün dünyanı o gicgiciyə bənzəyən Sofiya kuklası ilə doldurmaq olmaz, hamını robatlaşdırmaq nə alınası işdir, nə təbii təkamülə uyğundur. Bəlkə də, yaponlar  virusa yoluxmaması üçün bundan sonra robort - həkimlər düzəldəcəklər. Amma o da xəstəyə  can yandırmayacaq, canı yanmayacaq. Bir insan həyatın xilas etmək üçün indiki kimi özünü fəda edən həkimlərdən olmayacaqlar. Çünki  proqramdan kənar çıxa bilməyəcəklər. İnsanı heç nə, heç kim, heç bir varlıq əvəz edə bilməz!

Koronadan sonra dünya daha qəddar olacaq, biləsiz. Uşaqlarınızı   belə bir dünyadan keçib böyütməli olacağı təəssüf ki…

Musavat.com