"Gələcəyin yanacağı" ilə dolu yataq tapıldı:4,7 milyon kilovat-saat enerji...

Kanadada yeni aşkar edilən yataq enerji keçidinə töhfə verə və karbon emissiyalarını azalda bilər. Nümunələrin təhlili göstərir ki, bu yataq ildə yüzlərlə ev təsərrüfatını enerji ilə təmin etmək potensialına malikdir.

Blic.rs xəbər verir ki, məlumata görə, söhbət təbii hidrogen yatağından gedir. Hidrogen uzun müddətdir “gələcəyin yanacağı” kimi qiymətləndirilir, çünki onun istifadəsi zamanı karbon qazı emissiyası yaranmır və yeganə əlavə məhsul sudur.

Lakin əsas problem onun istehsalının baha və enerji tutumlu olmasıdır. Buna görə də alimlər yer qabığında təbii şəkildə mövcud olan “ağ hidrogen” ehtiyatlarına daha çox diqqət ayırırlar.

Toronto Universiteti və Ottava Universitetinin tədqiqatçıları 35 quyudan, 2,9 km dərinliyə qədər götürülən nümunələri analiz ediblər. Bəzi ölçmələr 10 ildən artıq müddətdə aparılaraq hidrogen axınının sabitliyi yoxlanılıb.

Nəticələr müsbət qiymətləndirilib. Hesablamalara görə, yataq ildə təxminən 4,7 milyon kilovat-saat enerji təmin edə bilər ki, bu da təxminən 400 ev təsərrüfatının illik tələbatına bərabərdir.

Alimlər bildirirlər ki, bu kəşf təkcə Kanada üçün deyil, digər regionlar üçün də əhəmiyyətli ola bilər. Oxşar yataqların aşkarlanması halında təbii hidrogen enerji keçidində mühüm rol oynaya bilər və bahalı infrastruktur ehtiyacını azalda bilər.

Qeyd olunur ki, gələcəkdə dağlıq regionlar – xüsusilə Pireneylər və Alp dağları – də təbii hidrogen axtarışı üçün əsas sahələrdən biri ola bilər.

---

---