Sosial şəbəkələrdə Azərbaycan Dillər Universitetinin rektoru, professor Kamal Abdullanın Ramiz Mehdiyevi yüksək təriflə təqdim etdiyi video görüntülər gündəmə düşüb. Kadrlarda o, Ramiz Mehdiyevi “böyük şəxsiyyət”, “dövlət xadimi” kimi təqdim edir, onun fəaliyyətini yüksək qiymətləndirir.
 
Müzakirələrin yayıldığı ana diqqət çəkən məqam isə odur ki, hazırda “Ramiz Mehdiyev işi” çərçivəsində aparılan istintaq fonunda bu cür arxiv çıxışlara münasibət kəskinləşib. Xatırladaq ki, bir müddət əvvəl sosial mediada Mehdiyevin 80 illiyinə həsr olunmuş filmə müxtəlif dövlət, elm və ictimai-siyasi fiqurların müsahibələrinin daxil olduğu bildirilmişdi. Siyahıda bir çox tanınmış şəxslərlə yanaşı, hazırda ittiham edilən Gültəkin Hacıbəylinin də deputat olduğu dövrdə Mehdiyevi yüksək təriflədiyi çıxışının olduğu xatırladılıb.
 
Musavat.com-a çatan bilgilərə görə, həmin vaxt haqqında çəkilən filmdə kimlərin çıxış edəcəyini öncədən Ramiz Mehdiyev şəxsən tərtib edib. Əcaba Mehdiyevin xain "Dövlət Şurası"ndakı 50 nəfərlik siyahıda həmin şəxslərdən kimlər var? Daha bir sual: filmdə danışan şəxslərdən bəzilərinin istintaqa çağırılması fonunda Kamal Abdullanın da məsuliyyətə cəlb olunacağı mümkündürmü? Hələlik bu barədə rəsmi açıqlama yoxdur.

---

---